De spreeuwenvangers

Flutse

Woar is den tied dat de menschen bie deeste riemdoagen noa de weien trokken voa spreeuwen te vangen?

’t Ende van oktober wierd er al in de lucht gekeken voa te zien otter gin scholen spreeuwen overvlogen. Je wit wel die zwarte wolken die beweegden van lienks nor rechts en iedere ki van vorm veranderden. En af en toe vielen ze in de weie. Sommochte keren u stik of hoenderd en ook wel u ki u poar duuzenden.

De spreeuwevangers an ulder kotje in de weie en doa voren ulder net dan ze kosten loaten toesloan vanuut ulder barakstje.

De zundag was ’t er stief vroeg u messe voa de spreeuwenvangers die ulder ton kosten installeren in de weie. Zan nateurlik ook ulder flaschtje koeroage mee tegen de koede.

’t Beste was ot goed geriemd at en ot begoste kloar te worden.

Dur zoaten altied u serieje spreeuwen met u towtje an ulder poat ip ’t pling voa dandere an te trekken.

En ieder spreeuwenvanger ad u schuufeletje voa de roep van de spreeuwen achter te doen. Dur loagen ook u poar appels of peiren tussen de netten van dad eten ze geren.

En vielt er tonne u wolke spreeuwen uut de lucht ton moesten de netten toesloan en ajje pries. Kostje met u poar hoenderd veugeltjes noar huus goan ton wasje dag goed.

Nateurlijk woaren ’t nie allemolle spreeuwen... dur zoaten ook zang veugeltjes tussen lik vienkstjes en tiertjes en putters.

En ’t is doar dad de miserie begon is.

De groene kwoamen doar tegen ip en in 73 verbood Tindemans de spreeuwenvangste.

’t Was gedoan met de leute en purtans was da stiefgoed.

De spreeuwen mosten gekuust worden en ot al de pluumptjes dur of woaren wieren ze gebruneerd in de panne en ton ipgezet lik stoofvlees.

En achter u poar euren (je wist nooit otter ook oede bestjes tusschen zoaten die toai waren) kwamen de spreeuwtjes ip je talloore en kost de peuzelienge begin.

’t Was vele beziggoedienge en je moest ippassen voa de kleene beentjes da je je niet verslikte!

U schep putatten en un adjuunsowstje en ’t was kerremesse.

Joaren nadien wierd er nog altied gevangen mor dur was vele controle en dur woaren groate boeten bie zoverre datter nu spreeuwen nie mè geeten worden.

Ip'de markt zie je dur soms nog wel die geschoten zien binst de jacht (dat is nateurlik dikke zever hé).

’t Schoan vlees da woaren de bostjes en da was voa moeder de vrouwe.

De peuzelienge an de billetjes en ’t karkastje da was voa voader en djoengers. En binst woaren ze stille.

Ja woar is de tied: eest putatten en adjuuns goan roapen ip de afgereen stikken en ton spreeuwen vangen in de gezoende lucht.

Spietig dat dadde allemolle gedoan is moa ja, wien wit gomme misschien bin u poar joar meeuwen kunnen vangen of eksters en kraaien.

Oendertussen zien de spreeuwen an ulder gemak en kunnen ze al ons fruut ip eten en vanuit ulder slapbomen onze otto’s vul schietten.

De tieden veranderen hé, ’t is niet an te doen !