Ip zun Heists - Leveranciers in de straat

Flutse

Woar is den tied da ze mè vanalles noar huus kwamen en dad de vrown toch nog alle doagen in de vornoene kommissies mosten doen.

De populairsten was zeker Vostje met de gazette. ’t Vintje sproeng ip zien villo lik un aptje en ot ie zien zoate miste zat ie mè zien spil ip de buuze en heel ’t geburte stoend ton in rep en roer!

Ook de bakkers deden ulder toer en een van de speciaalste was zeker Ons Brood met peird en karre. Of Gaspar met zien hoendekarre die met melk an de deure kwam.

Gin flashen moar u kasserolletje en de melk wierd uut de grote biedong geschept, per piente. En ton ojje nog de browers (Vestel, Dieusaert, Schroddertje...) die de drank an huus brochten. Suurtoe veel toafelbier mè zukke speciale sluutienge.

In Heist woaren dur in den tied vele broweriejen en wierd er meestal an toafel bier gedroenken.

’t Was u schoon zicht iedere nuchtend aan de voordeuren in de stroate want dur stoend vanalles kloar: lege flashen, u potje voa de melk of u brieije met un bestellienge. En iedereen liet da geruste en de voordeure was nie gesloten.

Was moeder nie thuus ’t wierd in de gank gezet, zoender vele komplimenten.

Vroeger giengt dadde allemolle vantzelfs en dun een kwam ook gemakkelijk u kè bie den andem in huus. De menschen sproengn gewillig u kè bie mankoar binnen.

Ook de fakteur deed dadde en ie deed ton ook u klaptje bins dad ie u dreupeltje bin klojde. De fakteur zoagen doede menschen stief geren komn want ie had ulder pensioentje mee. Da wierd vroeger nog thuus uutbetoald hé in dand.

De bakker, de brower, de beenhouwer, de fakteur, de gazettemarchang... iedere nuchtend was ’t druk en aan de vrown biena gin tied voa te kuuschen.

Moa dur woaren ook nog anderen die an de deure kwamen.

Guusten van den elektriek kwam de konteur ippakken en deed ook geren u klaptje met de menschen. Nie voa niet dat ie in de politiek zat.

Een anderen was Pol van ’t woater. Den dien kende ook iederéén en speciaal de moedertjes. Ze zoagen em geren komn want da was u babbeloare en bracht ook de latste nieuwtjes mee. Een da ze niet zo geren zoagen komn was de koolmarchand want da was iedere kè un hoop vuiligheid.

Van mazoet was tur nog gin sproake van ’t was lik of da Achiel Van Acker zei: Kak of gin kak, kolen in moeders bak. Ot er u keldergat was kwamt de vuulte nie binnen. De koolmarchand kost tonne de koolzakken legen an de kant van de stroate rechte in de kelder. Mor dur woaren dur ook die u kolenkot aan vanachter en moest ie wel deur de gank voa te leveren.

Da was nie gelachen van de koolmarchang zorgde vor u vuule stroate in huus.

Moa das nu allemolle gepasseerd.

De verwarmienge goat nu met den elektriek of met de goaze en dur moet niemand nie mè binnen komt voa te leveren.

Soms nog u kè vuulte met de mazoet...

Dadde is ’t voordeel van de modernen tied moa de menschen zien mankoar nie mè en zen gin tied nie mè voa te klappen tegen mekoar !