Ip zun Heists - Pèrdevlèès

Flutse

 Was dadde un spil de latste tied met da pèrdevlèès in de Lassagne. ’t Was lik of dad da rattevergif was.

We eten hele dagen alle soarten smèèrlapperieje en gin hoane die doar over kraoit. En al medde ki vienter doar un slimn un bitje pèrdevlèès in gekapt en de wéreld stoat ip stelten.

Ze moeten nateurlik serieus bluuven. Koeievlèès is koeievlèès en zwienevlèès is zwienevlèès en je moet tene nie verkopen an de pries van tandere.

Je moet eerlik bluuven en zeggen an de menschen wat dan ze in euler lère droajn.

An un Jood moe je ook gin zwienevlèès geven en an un moslim nog minder.

Moa zie moa gerust dad die mannen ook al un stikstje van un zwien binnen gespeeld en zoender da ze da wisten. En ’t zad ulde vurzekers nog gesmakt en ook !

Tis toch niet verkeerd met un stikstje pèrdevlèès hé !

Witje nog dad er vroeger ip den hoek van de Visscherstroate en de Pannestroate un pèrdebeenhower was ?

De menschen gieng geren noa Scherpereel achter un pèrdefiefstikstje. ’t Was gezoend en zochte en ’t korte nog niet te vele.

Un pèèrd is un schoane beeste en kriegen kik al hoenger onk een zien lopen.

Zie moa gerust dad er doar nieks mis mee is en ot da goed gereed gemakt is smakt da stief goed. ’t Is vor je viengers van of te lekken.

En je moet ton weten dad d’Iengelsmans d’eerste woaren voa te reclammeren. Oh, my God, zeider un vrowmens. Ze peisde verzekers dad de wéreld gienk vergoan.

Welhere, zad un stikstje pèrdevlèès geten.

Ojje ton wit wat dan ze in Iengeland allemolle in ulder botten droaien... Ze zoen moeten content zien on ze keure en van un stiktjes pèrdevlèès.

Moesten ze dad alle doagen eten ze zoender zieder zoa dèèrlik nie uut zien !

We geven vismeel an onze kiekens, afgedraoide olie vroeger an de koeien, en doarover wordt er nie mè geklapt. Mor un schelle pèrdebiefstik ip joen talloore... da komt in de gazette.

Ik gon ’t zeggen lik of dad is: je moet eten wat daje geren it en doar al nie tevele spil an verkopen.

En ot da vlees nu uut Roemenië komt of van bie de negertjes... ot moa gezoend is.

En da Roemeens vlèès is gezoend en diemenschen en ook nieks verkèèrds gedoan. Zen zieder pèrdevlees verkocht an de pries van pèrdevlèès.

En otter ton un Hollander doar koeievlèès van makt doa kun zieder nie an doen.

Dan ze hem straffen lik un bedrieger en hem achter slot en grendel steken. Gin probleem.

Moa da wil nog nie zeggen da pèrdevlèès slecht is.

Alli, je zoe moeten un ezel zien vor un ki gin pèrdevlèès teten !!!