Ip zun Heists - uutdrukkienge

Flutse

 Zoeje geloven dawwe succes en met ons stikstje Heists in ’t boekstje ?

Dialect dat is un twadde da moe bewoard bluuven, da mag niet verloren goan.

K liepen vandeweke ip de speelplatse en k hoorden doar de joengers babbelen en roepen noa mankoar... allemolle in schoon vlams met ier en doar un vrimd accent.

De kiendjes weten nu ni mè oewe damme wiender vroeger klapten.

Voader en moeder klappen thuus schoon vlams met oar ip... moa die typische uutdrukkiengen van bie ons en van de visscherieje kennen zienden nie mè.

’t Is un stikstje van ons zelven da verloren goat.

Ken gezien dat de provincie West-Vloandren un wedstried uutschrieft voa de schoanste uutdrukkienge. De regionale tillevizie eet er ook an meeholpen.

‘k geven hieroender de tien beste:

• ’t Zwien deur de béten joagen (uitbundig vieren)
• ’t schoap is de preute of (vermoeid, uitgeput)
• D’eksters weun hoge (een vrouw met lange benen)
• In de kerke pissen en tip d’heiligen steken (schijnheilig, hypocriet)
• J’et gin noagel vor an zien gat te scharten (onbemiddeld, geen geld)
• ’t Goa mollejoengen broaken (’t zal zwaar regenen)
• Zeet un muule van lintjes (babbelaarster, kletskous)
• ’t Is un scheete in un netzak (het trekt op niets, overroepen)
• ’t Fienste is ook zien oar (niet van de slimste)
• Scheur je puuste (ga weg, trap het af)

We zoen die lieste nateurlik nog kun anvullen want speciaal in de visscherieje ziender al un hele resem. Loap morreu n ki binnen in ’t museum Sincfala. ’t Hangt doar un grote schilderieje vul met uutgebeelde uutdrukkingen en durneffens ligt er un bladje met dun uutleg. Onze joengers zoen doar beter un ki noa toe goan van ze zoen tonne veel sprikwoorden van in schoon vlams beter verstoan.

De dag van vandoage wordt er vele gezeid moa de menschen stoan dur nie bie stille wat da da eigentlik wilt zeggen of van woa da da komt.

Alli, were al un reden vor un ki not ’t museum te goan. (tis in de Pannestroate)

En wien eter nu gewonnen met da spil van de provincie ?

’t zwien deeur de béten joagen

Ik vien da zeker nie ’t beste... ‘tis voa de meuren ip te lopen

Dur zien purtangs nog vele schondere uutdrukkiengen. Misschien dad Heyst Leeft u kir un westried lanseert. Kpeinzen dad er un twadde zoet uut komn van in de visscherie kun ze dur weg mee.

Moa ja dur zoed vurzekers ook vele roare diengen tussen zitten en ot niet te proper is zoender misschien van un scheete un dunderdslag moaken...