Terre ip ’t strange

Flutse

’t Is wa te zeggen otter nu olie anspoelt ip ’t strange.  Een milieurampe,schoa an de fauna en de flora da nie mè ’t hersteln is. 

‘k Goan nie zeggen dat da vroeger doageliksche kost was moa ’t gebeurde toch regelmoatig dat ‘t strange vul lag mè terre.  In de wienter kost da zovele gin kwoad mor in ’t seizoen was dadde een rampe.  Surtoe met al da volk da noa de kust kwam voa de zunne en de zee. 

’t Krie-oelde van ’t volk ip ’t strange en iedereen stampte in die vuule poosie.   

Meestal wisten we nie damme in de terre gestampt aan mor omme thuus kwaam was ’t eerste da moeder zei: ipgepast mè julder vuule voeten hé.  Bluuft ip ’t tapietje stoan. 

Otter terre an je voeten plakte en je gieng azzo nor huus ton wierd het overal bedretst en da woaren plekken die moeilijk uut te kriegen woaren.  Heuren wIerd aan de tapieten gekuuscht… De voeten wierden ofgewreven met nafte of alkol met een slunse of watte. 

De hotels langs den diek en de restaurantjes aan ook een hemelste schrik otter terre ip ’t strange lag want de vrimdeliengen brochten alles mee noa binnen toet in de koamers.  Ze kenden zieder da nie en wisten ook nie hoewe dan ze zieder da mosten ofkuuschen. 

Ik en altied horen verteln da die terre kwam van de boaten die ulder ruum aan ’t kuuschen woaren en al de vuulte in zee kipten.  Af en toe was ’t ook van een accident ip zee nateurlik. 

Van de veugels wierd er zovele gin spil van gemakt.  De doo meeuwen wierden ipgerapt en in een kortwagen gesmeten.  De menschen aan der ton nog nie vele kompassie mee. 

In de joaren zestig was Huib Gobert chef van toerisme en voa de eersten april had ie der nie beter ip gevoenden om via de radio deure te geven dat er vele olie was aangespoeld in Heist en  dan der stief vele veugels vul met olie ip ’t strange lagen te wachten ip reddienge. 

Da bericht kwam serieus over en vele menschen kwam met een kartongen doze noa ’t Heldenpling achter een meeuwe of een andere veugel.  Der waren de van an de kanten van Brussel, de Limburg en ’t Antwerpse… allemolle met goe bedoeliengen. 

En onze in de reke aangeschoven aan toet an den diek stoend er een groot plakkoat: 1 april. 

En dul da die menschen woaren en ontgoocheld.  Da graptje gienk volledig de mist in mor iedereen klapte der van en iedereen wist woar dat Heist lag.  ’t Was goeie reclame moa ’t zette stief vele kwoa bloed.  Moa ’t bewies was geleverd dat de menschen inzoaten met de veugels en de natuur en de zee.  Nu zoen ze klappen van een actie die insloat. 

De dag van vandoage kieken ze vanuit een vliegmachien otter gin boaten zien die vuulte achterloaten in de zee.  Ze worden ipgespoord en geverbaliseerd.  In d’hoave ziender ook meugelikheden om ulder vuulte kwiet te geroaken.  Ip da vlak is ter al vele verbeterd. 

Moa nateurlik die grote schepen met een bemannienge van kweet nie woar kiekken nie altied goed not bord en voagen an vele diengen ulder gat.  En af en toe emme nog een kè pries.  En nogal dikwijls moemme zelve ipdroaien voa de kosten ook.