Een nieuw boek over Heist ...

Flutse

't Is were zo verre. Der komt een nieuw boek over Heist van Georges De Vent en Arnold Roels. Van deze ki al de wienkels en cafés in Heist boven de boulevard. Nu nie Heist van de werkmens mor Heist van de toerist, (een bitje verder lees je der meer over!)

Een stikstje Heist damme wieder allemolle ken: d'hotels ip den diek, de wienkeltjes, de baigneurs, de crèmetjes, en nateurlik de terrastjes en de cafeetjes.

We gon were in den tied van juuste achter den orloge. Al die grote hotels die nu afgebroken zien voa al die appartementsgebouwen. De confettibals, de blommestoet, de zeewiedienge, 't muziek da kwam speeln, Carolientje met heur orgeltje, het volksbal van Anco, de vierwerken van Saint Michel (de sigaret van de sportman...) en Emilio de schilder die in 't midden van de zomer de meur van Zeebrugge schilderde vul met sneeuw, leder kart had ie een schilderietje kloar en wierd er een tombola georganiseerd.

De kabientjes die ip 't strange stoenden en 't woater dat tegen den diek kwam... 't strange was nog niet ipgespoten en dus vele léger dan nu.

De rampe met Photo Hall, de redders, 't Rood Kruus en een wuvetje met een weegschoale. En de trappen noa 't strange dan djoengers gebruukten als slierboane.

De brieslams (hoofden) woa damme krabben giengen vangen, mussels mochten trekken en karrekooltjes toope scharten. En oewe damme an de vrimdeliengen uutlegden hoe dajje een krabbe moeste vaste pakken zoender dat ie kostte bieten met zien niepers.

En al die aangespoelde terre van de boaten. Ojje doar in stampte brocht je die smèèrlapprieje mee noar huus en ton was 't panne. Ook de toeristen stampten in die terreplekken en slipten da mee nor eulder hotel. Al die schoane tapietten vul met brune plekken.

War is den tied dat de menschen noa 't strange kwaamn zoender badkostume. Ze kosten een zwembroek heuren bie de baigneurs, ulder verklèèn in een kabientje en 't sop in. De badkostume wierd uutgewasschen en an de wasdroad gehangen voa te drogen.

Iedere zundag kwamt er een vrimd muziek speeln ip de kioske ip 't Heldenpling. En 's achternoens giengen ze ton noar 't strange. De baigneurs stoenden al ip de loer voa ze ip te vangen want dat woaren viftig zetels in ene ki.

En die menschen bleven niet te lange want ze moesten met ulder ottobuus were noar huus en 't gienk vroeger niet allemolle zoa rap lik nu hé. Ze lekten allemolle gèren een krèmetje en kochten zeker een zakstje babbelutten. Ze mochten algeliek kunnen bewiezen dan ze in Heist gewist woaren hé!

't Woaren schone tieden en iedereen verdiende een frankstje bie. Moa 't was ook hard werken en in 't seizoen zeven doagen ip zeven. Een sluutiengsdag bestoend er nie. Je moste geld verdiend binst dat het te roapen vielt. En een ki de zeewiedienge gepasseerd en de blommenstoet ton wast gedoan. De lattestoars noa beneden, de gordien toe en in wientersloape. En nu is 't alle weekends seizoen...