Flutse

Snoens doenk ik altied mien tukstje en ken dor deugd van zegt mien dokteur. Ton doenk mien veste an en gonk goan wandeln. Mien toertje van gewente: langs de Boelvaar noa ’t bustje en ton were kéren langs dun diek. Alle doagen, deur were en wiend, ‘tzelste.

Vroeger goavenk in ’t bustje de beestjes un bitje eten mor nu ist er gin woater nie mè... Zen de viever ipgevuld met un oop zand. Stom hé van da was doar een duunepanne mè woater. Moa dad is verzekers vo de groene ulder tied. Verder in ’t bustje ejje nog de keunepit en da was ook een panne. Zen da beplant omdat ’t zand nie mè zoe weg woin en dad is ook tegen de nateure. ’t Is vele veranderd in ’t bustje. Vele meer vuulte en tiengels en kweetnie oevele bomen weg, ofgezoagd.

Binst dank kik ant wandeln woaren enk untwadde speciaals gezien. Een oedere vrowe met een kienderfeteure. Enk peizen in mezelven: welheere da mens, ze gebruukt zie die feteure zeker in platse van een looprekstje... Ze was lik al toed vor un klèènkiend en vor een achterkommertje was eur oven a veel te lange uutgebakken.

Kzien nogal een keurieuzeneuze en lik of da ze passeert droink mien omme voa te kieken noa da kiendje in de feteure.

‘k Verschooten mien oast een bulte. ’t Lag doa wel gin klèèn kiend in hé moar een oend. Un oendje met een vestje an. En schoetjes an zien potjes. De wéreld ip zien kop !

Luustert, ‘k zien ook geren béésten moar un oend met een pardesuutje an en schoen an zien potjes in een kienderfeteure dadde is toch moar allèène voar in Amerika hé. Ken zelfs al joenge kokketeuten gezien die geklid zien lik ulder noend... of omgekeerd. Ze paraderen met ulder noend en de klènen zit in de crèche.

’t Bèèstje stoend slekkevet. Nateurlik van ’t ad gin bewegienge. Echt woa, kaan der kompassie mee.

En da vroamens was assan moa an ’t klappen tegen da bèèstje juuste lik of da dad oentje eur gienk verstoan.

Witje gieder dad er al zien die met ulder kienderfeteure met un oend ip de tram stappen en doar de platse inpakken van menschen die gehandicapt zien of jonge moeders met kiendjes in een feteure of een sjarette.

En je moe nog ipletten wat dajje zegt van ze dien joen rap vanantwoorde.

Da madamtje gieng met eur feteure unt woar bin, pakte eur oendje uut de feteure en namt hem ip eur schotje. Ze drojde een potje open en pakte een kaffïelepeltje voa dad oendtje eten te geven.

Kzoagen eur zelfs voren proeven...

Gelukkig ee ze zie ook een kaffietje besteld van de garsong begost al te zwèten ot ie eur bezig zag en een poar stoelen verhuusde ip de terrasse vor eur kienderfeteure.

Van contentement da ze zie ook untwadde besteld eed kwam tie ton nog of met een potje water voa da beestje...

Mor je was nog nie heel zien hielen gedrojd of dad oendje efte zien potje ip en da water liept al tegen un toafelpoot ip de terrasse.

Gelukkig is zien eten dur in gebleven. Mo kmoeten ook zeggen dat er nu al stief vele menschen zien met een plastiek zakstje en die de stroent van ulder keppe iproapen.

Stroent is geld mor oe minder dad er ip stroate ligt oe liever dank het en.

En gieder verzekers ook hé ?