Ist van den oenger of van de goeste ?

Flutse

Vroeger aten de menschen onze oenger aan: ’s nuchtends, snoens en ‘s avonds.

’s Nuchtends een poar stuuten met beuter of smoet en een bitje saleije of konfeteure. Af en toe een geklutst eitje of spek met eiers of een droge woste.  Een eitje wierd ook wel een ki gebakken in een pèrdoge.  De menschen die moesten goan werken moesten vele eten voa kloek te stoan en vet was doar goed voren (cholesterol aan ze nog nie uutgevoenden…).

’s Noens een goe tasse vessche soepe en een stuute vor in te doppen.  Der achter petatten, groensel, vlees of vis.

De petatten woaren altied met een torre, da was balgvullienge.  ’t Groensel was dadde wat datter in die tied van ’t joar gekwikt wierd.  Da was ook ’t gekoopste.

Doa bie een ende woste, een bolle gekapt of een stikste boelie.  En ot ons moeder vessche soepe gemakt aat ton wast orloge voa de mergpupe.

’t Gebeurde ook wel dat da merg warm ip onze stuute geleid wierd met peper en zoet en ton wast kerremesse.

In Heist wierd er vaneigens vele vis gegeten.  De zee leverde vanalles en da smakte.  Alleene de vriedag wast nie zoa goed.  Vriedag was visdag want de kerke verbood vlees ip dien dag.

Dus in platse van soepe wast kerremelk of gortepap. In platse van vlees wast biena iedere vriedag kokvis met gestampte petatten.  Wieder aan vele liever een gebakken ploate of scharretjes of toengstjes.  Een terrebutje in dun oven of een gebakken griete da was vor je viengers of te lekken.  Roend karnaval wast sprot… heel thuus stoenk noa de vis moa der wierd gegeten lik of dat oorloge was.

En woaren dur geirnoars, krabben of mussels ton vlogen we dur ip lik vliegen ip een pèrdestroent.

’s Avonds were een poar stuuten met koas of espe of warm voa de werkmenschen die ’s noens stuuten gegeten aan.

En woar is de tied dat er nog spreeuwen gevangen wierden in november en december.  ’t Was vele werk voa ze te plumen mor on die veugeltjes een poar euren ip ’t vier gestoan adden ton wast een eure peuzelienge.  Da was wild vor de arme menschen of voa ’t geweune volk.

De zundag wast rosbief in dun oven mè zundagsche sowse.  Ip feestdoagen was ’t koeietoenge in de madeirasowse met pureepetatten en groensels.  Soms was da ook een zwiennetoenge.  Keun met prumen of een gebakken kieken… en ruzie moaken voa de velletjes.  Dun enen at liever een bille en dun anderen at liever ’t wit en de peuzelienge an de karkasse namt ook vele tied in beslag.

De menschen aten van de oenger moa met smoake.  Ot de moage trekt ist goed.

Nu eten de menschen omdat ze untwadde gezien en ip televisie.  Hele doagen moaken ze reclame voa te eten… en voa te vermoageren.  Ze werken da nu nie mè of hé.