Ip zun Heists...

Tis musschien roare da je in ons boekstje utwadde leest in toed Heists. Moa kpeinzen in mu zelven, ‘t goa musschien deugd doen aan doede garde.. .zu kun u ki ulder ertju ip oaln in de platse van ~l da schoan vlams...

Al du deze die iedere ki tboekstje lezen van Heyst Leeft goant zeker weten: Duunbergen bestoat hoenderd joar

En toch woaren dur nog vele die roare keken ot Heyst Leeft doar in november met tmuziek deur de stroaten van Duunbergen lieptigu, en doa toan nog u boomptje plantige ip ‘t plingstje

Da was eigentlik de boeké, den apotheose.

U hèèl joar lange emme geschreven over Duunbergen, over de geschiedenisse, over teen en tander datur gebeurd is, over een aantal menschen, en men ook wist goan wandelen.

Binst de wandelienge emme ook teen en ander gezien en goard damme nie wisten en twoaren dur toan ook vele die zein: ‘t was leute en men u twa biegelèrd.

Hoenderd joar bowen in de dunen : sjieke villa’s voa rieke mènschen en werk voa d’Heistenoars. Ge ziet, ‘t is altied voar u twien goed.

Onze die boom geplant èn, emme nog u ki utwadde goart over Duunbergen, en emme ook gezien oewe da de vrouwen van de gemeente (Ingrid Reubens en Anne Desutter) mè de schippe kunn werken. En mèn ulder zelfs ulder schippe zien ofkuusschen...

‘t Geistigste was om achter tmuziek te lopen en ton te luustern noa de serenade an de Dune résidence.

‘t Zoaten doar u poar vrimdelingen ip de terrasse en ze wisten zieder nie wattatter gebeurde. Heel da muziek in vul ornoat met de vlagge in de wiend en moa speeln en moa speeln.
Allè, zoander zieder in alle geval deugd van, want ot gedoan was klakten zieder in ulder hand gelik in ‘t theoater.

En toan hemme allemoalle èèn wist goan drienken. En kujje verzekern, jee gesmakt wè!

En ken ik wel gezien dat du dieje van tmuziek kun drienken lik of da ze kun speeln... gezoapig weg, intje mè du kèi. Dun èèn was toan ook vroeger tuus dan den andern, moa ja, ‘t is elk in zun eigen menoage... en wieder goan zeker de vuule waste nie uuthangn. ‘t Vurnoamste is da we nog u ki in de gazette gekomn zien.

A zo weten de mensschen tenminsten nog da we bestoan en ‘t biezoenderste : da we Duunbergen nie vergeten!

Achertnoa en kik langst stroate nog u poar kèren hoort: ‘t is jammer damme wieder da nie wisten... moa ja, ‘t stoend in ons boekstje en ook in de gazette, wa zoe je nog meer wilnda?

En voa nog u ki were te kèren up dien boom: ‘t is de bedoelienge dat ie doar hoenderd jaar bluuft stoan, al ist damme wieder da wè nie mè goan meemoaken zeker? En a zoa bluuft er toch utwadde over en kun de mensschen nog altied u kir upnieuw in de boekstjes kieken en u twa lezen over Duunbergen.

Van ‘t is nog zoa vele te schrieven en te vertellen. Ge god wè zien ojje verder kiekt in da boekstje. En â propos: ojje goeste èt voar ook u kir utwadde te schrieven, ge moet nie baten éé, want voar ons ist ook nie altied even gemakkelik, zoejt geloven?

In alle geval emme dur wieder allemoale leute méé get en we doen zeker voart, tnoaste joare en nog vele andere joaren.

Azo bluuft Heist in dactualiteit, en das ook belangrik. Normaal gezien gieng kik nu u ki goan wandeln noa d’Hermitage in Duunbergen... moaken gezien danze da ook al afgesmeten èn.

Ip den deur got ur niet nie mè rechte stoan, ‘t is toch spietig é! Ken zels goard danze in Heist de latste oede villas ip den diek ook goan afbreken. Akkoard, ze woaren versbookerd en kapot... moa t’ is toch doende é. En an den andere kant, kverstoand danze dur wiln geld uut sloan, oewe zoeje zelve zien...

Van oarmoewe goan we toanne moa not ‘t bustje. Moa ja, me meugen nu gèn krumeltjes broad nie mè geven an deendetjes. . . binst dank kieken goan de kastjes toan moa zelve ip eten.

Tis wè zo goed nie of u stuutje mè sjoko, moa ja, ot nie magt, maggut nieje é.

En onk van tbustje komn goan nog achter u tasse kaffie met u koegtje en d’achternoene is were gepasseerd.

Allè, de complimenten é, van...

Flutse