Ip zun Heists

Flutse

Voa sommige mensschen klienkt HEIST lik muziek in doren en vor anderen ist lik u vloek.

Je moet ur u ki ip letten oevele keren da ze vergeten dad Heist nog bestoat.

Heist Carnaval is in de gazette Carnaval Knokke-Heist surtoe ot goed is mor ot er u twa verkeerd lopt ton ist Heist.

Kiezen in de gazette da Kneistival in Knokke deure gienk en ot die dolfiene ant zwemmen was tusschen Heist en Duunbergen stoend er in de gazette: Dolfijn voor Knokse strand...

Mor ot er ingebroken wordt in Knokke ton stoat er zeker Knokke- Heist of Heist. ' t Zelfste voa drugs en andere roare diengen.

U poar Heistenoars en dur voren gezorgd dad ur u concert kwam voa Jimmy Frey en wadde enk gelezen in ' t Latste Nieuws: Knokke huldigt Jimmy Frey/ t Is toch wel vor overende te vallen zeker ? En de Zeewiedienge... da was in Knokke-Heist moa nie in Heist.

Nog nie lange geleen wast er zelfs u politieker die zeidt da Knokke beter in de moend ligt dan Heist of Knokke-Heist. Dun dien is zeker vergeten hoe da burgemeester de Gheldere gevochten eet voa de noame HEIST te bewoaren?

Ken niet tegen de fusie moa iedereen moet toch weten dat un Heistenaore ook u mens is en dat er in Heist ook vele goe diengen bestoan.

D' Heistenoars moeten ip ulder strepen stoan en de politiekers ambeteren anders gebeurt er bie ons niet nie mè.

Kiekt mor u ki nor ' t stadhuus van Heist. Un echte schande.

De boel stoat doar a moanden vor in te stuukken.

Da zoed in Knokke gin woa zien, zie moa gerust!