Ip zun Heists

Flutse

't Ziender nog winnig in Heist die feitelijk weten wat dat de fusie is. De meesten peizen da Knokke en Heist al altied tope zien en da Westkapelle en Ramskapelle doar ook bie woaren.

Zeker de joenge gasten die nooit anders hoort en.

De oede Heistenaors weten wel nog dat er vroeger allene gesproken wierd over Heist-Duinbergen.

On de Knokkenoars noa de kerremesse of noa carnaval in Heist kwamen ton aan ze keure dat er boel van kwam.

Wieder moesten ier nie weten van al die blago j derie j e. En de deze van de tuunwiek pakten e ki geren de Knokkenoars met ulder dikke nekke vaste...

Knokke was Knokke en on de menschen commissies mosten doen ton deen ze dat in Heist en voa speciale diengn giengen ze noa Brugge. Kleren vor deerste of de plechtige commienie... of de solden voa batjes te doen!

't Was u roariteit dad de menschen van Heist noa Knokke giengn. Veel te vele strekevolk en veel te vele Frans.

Moa de politiekers zagen dadde anders. de Gheldere en den oeden Lippens en ulder u ki tope gezet en gekeken oewe da de CVP an de macht koste bluven. Knokke was nog a liberoal en zan doar ook al Gemeentebelangen (kaloten en liberoalen). In Heist was de CVP boas en in Westkapelle en Ramskapelle woaren took meest van al kaloten.

En omdat er nationaal toch u verplichtienge was voa de klène dorptjes tope te smieten kwam da goed uut.

Je mag ook nie vergeten da Brugge u stikstje van Heist wilde voa dhoave van Zeebrugge! Allene u grote gemeente kost em weren tegen Brugge.

En azoa wierd er in de vier gemeenten beslist om mè mekoar tope te goan. Je ku wel peizen da da nie van tzelfs gieng van overal woaren dur die liever allene bleven en boas wilden zien in ulder eigen prochie.

Ier en doar wierd er u twadde beloofd vor u zeune, u broere of u nichtje of kozientje en de buk was vet.

Met de verkieziengen van 1970 kwamt de pronostiek uut en de CVP a grote winste... en wat dat er niemand gepeisd had: Heist deed het best van al en kreeg de beste postjes.

Moa dad eet nie lange gedeurd van ojje nu de gazetten leest klappen ze nie mè van Heist mor allene moa nie mè van Knokke.

Of tis dat er u moord gebeurt, dan ze inbreken, dad brandt of un ander twa roars... ton schrieven ze nog wel u ki HEIST.