Ip zun Heists - De kiezienge

Flutse

 De kiezienge ’t Is were gepasseerd, men wieder were ons zegtje kun doen. Van deze ki nie mè met un potlood moar met de computer. Leve de modernen tied!

Tender vele in ulder hoar geschart mor u ki dajje ‘t gordientje achter je toegetrokken had gienkt vantselfs. Heist is tur nog redelik goed uutgekommen en tis topen da ze nie goan vergeten van wien dan ze ulder stemme gekregen hen.

Pietje Degroote bluuft schepen en Anthony Wittesaele en Chris Demeyere worden schepen en volgens dank ooren zoe Philippe Vlietinck (Fluppe Stove) achter drie joar ook in ’t schepencollege komn.

Dad doe me peizen aan vroeger mè Zuttertje, ’t Jeppen Spekke en Boer Koene. Ze woaren ton ook met drieën. De drie muusketiers moa loater met vieren. Ze gon kun koarten.

’t Begost eigentlik al goed.

We wisten nog moa zjuste wien dat er verkozen was of we loazen al in de gazette da ze ’t stadhuus van Heist giengen afbreken.

’t Is topen da ze dat spil van durneffens met da geroest iesderwerk ook gon plat smieten. Toed stadhuus in de Kursaalstroate stoat te koop en got allichte ook afgebroken worden. ’t Stadhuis ip de grote markt moet ook tegen de groend.

Ze zien goed bezig. Moa ja, je kut gin eiers eten zoender de schoale te breken en ot verbeterienge is vienden kik da goed.                                              .

‘k Zien tal voa me: under de markt een grote parkieng met un danszoale (zoender lawijt) en ‘t beste zoe zien un schoan hotel in platse van ’t hotel de ville.... van in Heist emme da biena nie mè. ’t Zwembad in Heist moet ook zien kèse uutbloazen. U zwembad in Knokke is genoeg... vor Heist is da nie noadig !!! (Moa d’ Heistenoars peizen dor anders over) En ton ier en doar nog een torre vul met appartementen.

En dad dandere menschen in de schouwe zitten da speelt gin rolle... ’t is ’t geld da moe roln. Teldenpling zoed ook veranderen en dad is mo goed ook van dad is nu un doad pling. En vroeger zukke schoan platstje met blommetjes, gas en luchtjes.

Dur zien zovele schoane dieng te doen in Heist en ’t is topen dad ur eindelik un kè van komt van ’t is noadig. Tis topen Damme bin zes joar weren ie moeten zeggen: en ze droenken nog un glas en alles bleef zoals het was !!!