Ip zun Heists - Men un nieuwe Keunienk !

Flutse

 Met al da schoan were in juli zag Albert het nie mè zitten en vroegt ie zien pensioen an... je was ook al ip zien tachtigste.

’t Nieuws kwam lik un bomme: Albert trekt de leere ip. Toope mè Paola got ie genieten van un welverdiende rust!

’t Is nu aan Philippe (of moeten we zeggen Filiep of Philip... de politiekers goan wel beslissen hoe dad die mens zien noame moe schrieven). (in Heist zoen ze zeggn: Fluppe van Berten Kooburg).

Al bie al ist goed verlopen en Philippe stroalde neffens zien kokketeute (jeet heur zelfs un poar keren dichte gepakt en un smokstje gegeven).

Philippe is ter kloar voaren en Mathilde ist tur lik voaren gemakt.

Dan ze moar a goawe un kè noar Heist komn... da moe niet altied in Knokke zien da ze wandelen ip dun diek of noa de messe goan bie de poaters.

Otter un twien van ’t paleis noar Heist komt is nogal dikwijls un kè voa miserie. Een accident ip zee... iemand die in zee gebleven is.

Boodewien heet dat un poar keren gedoan en ’t was un grote troost. Jis hier ook un poar keren gewist zoender te verwittigen uut respect voa de menschen die in de miserie zoaten.

Albert is hier nog gewist met de visschersmesse en de Klakkertjes woaren ook zien moaten.

Kgon un kir een vertellen van een bezoek van Keunienk Boudewijn an Heist:

’t Was inde joaren tjestig en de Gheldere was nog burgemeester.

Ip un bepoald moment stopt er un sjieke luxevoiteure voa ’t stadhuus en de politie van wacht ziet dad de keunienk in dien otto zit.

Je vliegt noa boven nor de bureau van de burgemeester en zegt tegen de Gheldere: Burgemeester, de Keuninck stoat voa de deuren.

En de Gheldere (die peisde dat het gemeenteraadslid De Coninck was - de vader van Minister Monica De Coninck) zei:

Lat hem mor un bitje wachten van kzien juuste bezig met un twadde

Die politie scheet oast in zien broek en riep: jamoa, ’t is dun echten wi, ’t is keunienk Boodewien !!!

De burgemeester de Gheldere is ton subiet noa beneden gegoan en eet dun keunienk begroet met alle honneurs.

Nu zoet da nie mè gebeuren van dur zitten biena gin polities mer in Heist en de burgemeester heet zeker gin bureauwerk in Heist.

Philippe got zien kabinetschef Francis Vandaele (un Knokkenoare) wel eerst un ki loaten bellen nor ’t stadhuus.

Doar goan ze wel weten woar dan ze Pol kunnen vienden (ot ie nie in ’t buuteland is) en dur bie, Philippe en Mathilde kennen goed ulder weg in Knokke, surtoe in ’t Zoute.