Woar is Rozeetje ?

Flutse

On de menschen een stroatevoager bezig zien langst de stroate ton kieken ze doar noa toe van uut d’hoogte: ’t is moar un stroatevoager.  Een beetje lik of dan ze vroeger zein… een stroendloper van achter de tring.

En toch willen we allemolle dat overal proper is en dat er langst de stroaten gin vuulte ligt… vuulte damme wieder meestal zelve doar gesmeten hèn.

Rozeetje boem boem was een stroatevoager in herte en ziele.  Zien stroaten woaren altied proper.  K’zoen biena zeggen dajje dur van de groend koste eten.  Mo iedereen voend da normaal da Roger bezig was mè kuuschen.  Dad ie ant voagen was of met zien schippe alles in zien karre smeet.  Nu da Roger ip pensioen is klapt iedereen dur over.  De menschen missen hem.  Roger was un stikstje van de stroate.  In Knokke hangt er in ‘t stadhuus een schilderieje van een stroatevoager.  Ewel, in Heist zoen ze meugen een standbeeld moaken van een stroatevoager… van Roger.  Moa ja, ze gon ’t stadhuus van Heist ofbreken…

Je ku nie geloven hoevele vuulte da de menschen achterloaten langs stroate.  Een papiertje van een spekke, een restje van een sigarette, een servietje van een crèmetje, een steen van een pruume of van een kèze.  Ip de parkeerplatsen zien dur zelfs die heel ulder asschenbak uutkletsen ip ’t stroate.  ’t Zien vortzakken !  En ’t zien die deze die ’t luudste roepen dat proper moe zien.  Hoevele zien der niet die met ulder vuulzakstje noar een vuulbakstje ip stroate komn vor ulder eigen vuulte doar in te duwen.  Vuuf menuten achter da de mannen van de vuulkarre de vuulbakstjes geleegd èn zitten ze a were vul.

Woar is den tied dad iedereen voa zien eigen deure kuuschte.  Al die menoagewuuvetjes die alle doagen ulder trottoir ofscheurden en ulder ruten waschten.  En ton die vinten die met een petattemestje tussen de garren van de tegels schripten voa ’t oenkruud uut te kriegen.

Ook de parkeerplatse voa de deure (vroeger meestal in kassie-stenen) wierd gekuust en proper hoeden.  Hoevele zakstjes zoet (zout) wierden dur nie uutgestrooid tegen toenkruut.

Nu ist allene hier en doar nog een commercant die zien trottoir ’s nuchtend kuust… voa gin hoendestroent bin te kriegen in de wienkel.  En de wienkeldochters die de ruten waschen.

De boastjes van al die hoenden en ook gin manieren.  Ze loaten die beestjes pissen en kakken geliek woar en geliek wanneer.  In platse da ze dad hoendje in de grippe trekken of boven een riooldeksel zetten… neen, voa de deure van untwien anders.

Chance dad er al vele een zakstje mee hen en ulder stroent iproapen.  Dad is een grote verbeterienge en proficiat aan al die menschen die da doen.  Respect !

Od iedereen voa zien eigen deure kuuscht en zelve gin vuulte achterlat ton got overal proper zien en gon de stroatevoagers veel minder werk hen en zoender problemen ulder toer kunnen afwerken.  En lik Roger: ’s avonds ton ip ’t gemak een kir een pientje drienken tussen ’t volk voa te luustern wa datter goande is in de gemeente en woar da de grotste vuulloards weun.