Ip zun Heists -  Een schelletje of een bolletje ?

Flutse

Als kient wast altied kerremesse onk mè mien moeder mee mochten achter kommissies.  Vroeger was da doageliksche kost want er bestoend nog gin diepvriezer of frigo en de bèènhower verkocht nog gin dagmenuutjes… juste moa vesch vlees.

Ojje als kiend mee mochtte noa de bèènhower ton kreeg je garantie ip tende van de bestellienge een schelletje vlees.

En wa wil je vintje?  Een schelletje of een bolletje?  Oftewel wast een schelletje hespewoste schone ipgedroid en zoender velletje oftewel een bitje gekapt in een bolletje gedroid.  En da koste smoaken hé.  Voa damme binnen gieng in de wienkel zei moeder: je ku zien da je nieks vroagt hé, gebruukt je manieren en wacht toe da de bèènhower zelve untwadde presenteert.  En as kiend stoeng je ton voa den dis mè vroagende oogtjes te wachten toe da de beenhower untwadde zei.

En iedere kèèr ipnieuw zei moeder tonne: en wa zeg je nu, danke.

Bie de bakker wast van tzelfste.  Moeder kocht een menoagebrood en een bitje toespieze en de bakkerinne zei ton altied: en moe je een spekke en vintje?  Vaneigens, dorvoaren woaren we meegekomn.  Nu gon de vinten mee met ulder vrowe noa de Colruyt voa de proevertjes..

Een spekke uut een groot bokaal en ot goed gieng een lekkestok met een papiertje durroend.  ’t Was toch geestig voa mè moeder kommissies te doen.

Nu is dadde allemolle gin mode nie mè.  De karre wordt gevuld en aan de caisse wordt er betoald.  Gin spekke of een schelletje.  Ot goed goat juste nog: bedankt hé… en de buk is vet.

Nu wordt er gekocht voa meer dan één dag, soms vor een hele weke.

Alles zit verpakt, ip voorhand gewogen, de schelletjes geklasseerd met een papiertje dur tusschen omdan ze nie zoen aan mankoar plakken… en ton nog een plastiekstje durroend tegen tuutdrogen en ’t verkleuren.  Pas ip, ’t is wel alle doagen allemolle vesch tuug en goeie kwaliteit moa d’ hertelikheid is weg.  Da babbeltje, da menschelik contact.  ’t Is allemolle van hoast je zere wère je.

Den otto stoat verkeerd geparkeerd voa de wienkel, de joengers zitten nu in den otto te wachten en onze an een snoepje wiln geroaken ton moe moeder da eerst kopen in de wienkel.  Niet nie mè voa niet… un poar wienkeltjes zien gelukkig nog anders ingesteld.

Ene kir in ’t joar ist de dag van de klant en ton krieg je nog untwadde.  Een bedangkiengstje omdat je regelmatig noa de wienkel komt.  Da vervangt da doageliks schelletje of snoeptje voa de joengers heel ’t joar deure.

Ja de tiedden zien veranderd… de commerçanten zien veranderd mor ook de kalanten.  Geeneen eed nog tied en  ’t is van zere binnen en buuten.  Je moet tegenwoordig al een numerootje trekken om dan ze niet zoen voorn krupen.  Ze zien toch azzo pressé  hé!