Ofbreken en ipbown...

Flutse

In 't leven ejje optimisten en pessimisten. Voa den enen is 't glas half vul en voa den anderen ist half leeg. 

Ot regent zegt den enen dat tegenstikt en zegt den anderen 't is goed voa den hof. 

Onze een huus ofbreken zegt den enen 't was tied dat die vuule boel met de groend geliek gemakt wierd en den anderen zegt 't is toch wel zoende dan ze alles noa de voantjes helpen. 

In 't schoan Vlams zeggen ze: snoeien om te bloeien ! 

In Heist ist er ook al van alles ofgebroken: 't koarters hu zetje in 't bustje, de viever in 't bustje, 't koartershuzetje langs de Knokkestroate, 'ttramkotje, de roste spekkebakker zien doenienge. 

En der stoat ook nog teen en tander ip 't programma: 't stadhuus, de stoatie, den depot... Moa der komt ook van alles nieuwe. 

Langs de boelevard komt er van an 't puuttepling toet ant 't bustje een schoane bree troittoir. Zoa chique lik in Barcelona. 't Is 't hopen dat er ook vele wienkels komn. 

't Heldenpling wordt in 't nieuwe gestoken (een schoon bovenpling met der oender garages) en in de Knokkestroate komt er een hoge torre (of méér dan één ???) en een oendergroendse parking en vele schowe en wiend voa de menschen durroend. 

't Stadhuus wort herbowd in 't midden van de markt en rechtover 't Boerenhof zoed er ook een zoale komn voa de joenge gasten. En 't museum Sincfala kriegt ook een nieuwe zoale. 

't Goa vele verandern in Heist. Al nieuwe en nie mè terkennen. 

Onze ook mor een bitje kieken noa de oede diengen lik 't Boerenhof, 't Is thopen dat de scheure ook a gowe ipgekalfoaterd wordt. 

Wat dank stief schoane vien is de gevel ip den hoek van de Sint Jozefstroate en de Sint Antoniusstroate. De voorfacade en ze loaten stoan en derachter komt er een grote nieuwbouw. Wit je gieder dat dadde 't huus was van Leopold Desutter, de zoveelste grotvoader van onze Manu en ook nog burgemeester van Heist gewist? 

Voa de kiezienge van 1958 was 't grote punt de vernieuwienge van de deurgank van Heist. Vantorre heet doar den ene bow achter den anderen gezet, 't Is verre zien stroate. 

In de latste viftig joar ist er al vele veranderd en nu wordt het were allemolle vernieuwd. Ze zien goed bezig, lat ze moa sjette geven. 

Je moet een ki goan kieken voa te zien wa vorre plannen der al uutgewerkt zien moa 't is de moeite voa joen kop een ki binnen te steken in Scharpoord. En 't is voa niettend hé I! 

Flutse