Eiers roapen

Flutse

Poaschen is een zoaligen tied. De klokken van Rome... eiers roapen in den hof... de doagen lengn en de zunne begint al een bitje warmte te geven. Moar der zien ook aprilse griln en moartse buujen. De sneeuw zit nog in de lucht en der vallen ook nog hoagelsteen.

Carnaval is een hoogdag en hopelijk 't ende van de wienter moa zeker 't begin van de vasten.

't Begint met Aschen Woensdag ot iedereen met een zwart kruus ip zien vorhoofd roend Mept. De joengers die noa 't schoale giengn mochten da kruustje nie ofvoagen want da was gezegenden aschen van verbrande palmtakstjes en anders zoen ze nie kun zien daje noa de messe gewist wordt snuchtends. En de paster had gezeid: Gij zult tot as wederkeren...

Achter carnaval en aschenwoensdag wast vasten. Een bitje minder eten dan gewente (en suurtoe gin snoeperieje) en de vriedag kokvis en kerrepap.

Sommigte menschen giengen noa de kerke voa de kruusweg en tegen 't ende van de vasten begosten al de menoazjewuven met de grote kuus. De tapieten wierden noa buten gehoald en uutgeklopt met de matteklopper. De gordienen wierden gewaschen en de plafongs geschilderd. De zulle wierd ofgescheurd en 't gas van tusschen de kassiesteen gehoald.

De meubels wierden gecireerd en 't koperwerk ipgebloenken en in den hof bloeiden de poaslelies, de krokussen en de hyacinten en de tulpen stoaken al ulder kop omhoge.

De veugels begosten te schuufelen en ze mieken nesten vor eiers te kunnen leggen en te kweken. Der was nieuw leven ip komste en in de weie kost je dadde al zien want de lammetjes liepen in 't vesch gas achter ulder moeders elders vul met melk.

lp Witte Dunderdag en Goeie Vriedag moesten we met 't schole noa de kerke, 't Was triestig want Onze Lieven Here was were doad. 't Ergste van al was de stilte want de klokken woaren noa Rome (achter eiers).

De zoaterdag voa Poaschen giengen de menschen noa de wienkel voa teen en tander in huus thoalen voa Poaschen. De familie kwam thope an de feesttoafel. Moeder had were heur besten gedoan en der wierd gegeten en gedronken lik of danze allemolle uutgehoengerd woaren achter die vasten van veertig doagen. Koeietoenge met madeirasowse of rosbief in den oven met pureepetatten en sjiekongs...

Moa de kienders keken 't meeste uut noa de eiers die overal verstopt loagen in huus en in den hof. Om ter meest en ton stille oender toafel krupen en sjokola beginnen 't eten binst dat niemand zag. Oewe dat die klokken van Rome die eiers transporteerden nor ons thuus hemme ons nooit ofgevroagd mor één dieng was zeker: in Rome kosten ze goeie sjokola moaken. Der loagen grote en klintjes soms in zilverpapier en soms nie, melksjokola of fondant 't koste ons nie schillen van 't was wreed smoakelik en zeker in den duuk.