Ip zun Heists - De vinten...

Flutse

 In ’t latste boekstje wast kerremesse voa de vrown. Ken tonne e ki geluusterd bie ’t mannevolk wa dan ze zieder allemolle wisten te vertellen over ulder wuvetjes en wa vorre schone diengen ze doa vooren gebruukten.

Moa ken nu ’t zelfste gedoan voa de vinten. Je ku nie geloven hoe lange dank dorvooren bie die vrowmenschen en moeten bluuven... euren en euren en da stopte nie.

Deene zei dad eur vint un hutseklutser was en dad ie alle doagen poepeloere zat nor huus kwam. Je mag wel u kir un zinder ip en moa je magt er gin gewente van moaken.

En van ot ur e schete verdroid zat was tie were weg voa zien miserie te verdrienken en ton kwamt ie were thuus met un scheve mutse. Ze voenden zieder dadde allemolle e grote kwiestenbubbel en de meeste zoen doar ulder pap nie mee kun koeln.

Mo dander at ton were e wiendzot van e vint. Un oevèrdigoard eerste klasse met e pretentiemuule van kgojje goan en. Un blagoj met vele wiend in zien broek. Ja, un echte zjistekoker. Ik zoen mien pap nie kun koeln mè zukke zjistevint wi...

En eerlik gezeid mè zukke strekevint kujje as visschervrowe toch nie leven hé.

Mor al bie al is da ton nog beter dan e ploote van e vint. Een die tien keren zien frank (euro) zoe droin vore em uut te geven en ton nog tegen zien goeste. Een die van gierigheid zien wuuf eur tallore zoed uutlekken. Ja dur lopen roare kwiestens roend ip de wereld...

Dun enen is un broekschieter en dun andem zoet al versloan en jet ton ook nog trutseloars die altied en overal te loate komn. Jet toch vele wiestegois van menschen ip de wereld wi.

’t Ambetantste zien die zeveroars die ip alles u ’t wadde weten en hele doagen ant muggeziften zien. Ze lopen met un lippe toet ip de groend en ojje ze tegen komt ejje pries. En tonne ejje ook nog die trutseloars... van kom je dur vandoage niet ton kom je dur morgen wel. Da ziender dajje liever ulder hieln ziet dan ulder teen.

En met al zukke wiestegois moeten onze vrown ulder pap koeln. ’t Is doarom dat die vrown geren ulder menoage doen zoender vinten roend ulder.

Ze verdient ton ook un standbeeld moa ja, ’t is ook un ’t wadde van de meeuwen komn dur ton ip schietten en ot jun oanzichte vul mè kurremurre en poosie hangt ist ook nie mè geestig hé.

We goant moa loaten likt of dat is en af en toe un ki ons wuuvetje tegen onze gilet trekken dasse wit damme nog altied content zien... met of zoender standbeeld.